Waggis-Clique
GILLERUGGER
Basel 1961
Fasnacht 1993
CIBAFFEZOLLI
Am Samschtig morge sait s'Molly zem Bolli:
"Kunnsch mit mer in dä tolli Zolli?"
Do muult dr Bolli:"Loos jetz, Molly,
ych ha doo none Fläsche, e volli!"
Druffaabe s'Molly:"Hösch, jetz schmoll y!"
Dr Bolli isch zwor mied vom schaffe,
doch goot er glyych mit zue de Affe.
Scho steen sy vorem Door zem Zoo,
sy zaale und dien denn yne goo.
Zerscht laufe sy grad zem Affefelse,
s'Molly sait zem Bolli:"Schell se!"
und streggt em e Banaane aane,
"Was sell denn das doo, nundefaane?"
froggt dr Bolli und blybbt stoo,
"Wo isch denn dä Felse aanekoo?
Ych glaub, mir laufe wider zrugg,
doo seets jo uss wie d' Wettstaibrugg.
Wo d'aane luegsch, nur Lecher und Latte,
hänn die e Gratzer uff dr Platte
oder dr Gilb in iirer Wösch?
Wo sinn die Affe aane, hösch?"
E Wärter heert's und sait:"Hösch, Digge,
mer hänn sy miesse in d'Ciba schigge.
Dert dien sy jetz e Halle bsetze,
well mir do mien dä Glotz versetze."
"Das mues ych gsee ha!" rieft dr Bolli
und haut's mit em Molly usem Zolli.
Im Klybegg an dr Ciba-Borte,
gseet me scho e Affehorde
wo ummegumpt und Nissli frisst,
e Wächter, wo sy Pflicht vergisst.
Statt z'wache duet är Riebli schelle
und laufend Affewitz verzelle.
Hinde dien zwai Affe luuse,
drey dien pfuuse, vier dien schmuuse,
e baar Schritt wyter fletscht ain d'Zeen,
und bysst mit Wolluscht ine Geen.
"Isch in dämm Affetheater au emoll Rue?"
froggt dr Bolli "oder goot's doo immer so zue?"
Dr Wächter lacht zerscht, doch denn blöffter:
"Nai, nai, nit immer, aber immer öfter.
Syt d'Affe doo sinn, hämmer's luschtig,
s'Lääbe isch nimm gar so fruschtig.
Zerscht sinn sy dinn gsii, in dr Halle,
doch hett's ne dert inne nit lang gfalle,
sy sinn denn uuse und hänn doo,
die ganzi Ciba ibernoo."
Ganz hinde uffem Bahngleis drey,
heersch uff aimool Affegschrey,
sy händle ume baar Tablette,
wo ummeligge uff Balette,
dr Krauer segglet zwaine nooche,
wo mit sym Velo umebloche.
D'Ciba-Fyyrweer ruggt grad uss,
uff dr Laitere verliert e Aff e Nuss.
S'Molly schreyt:"Ych glaub's jo nit,
die mache doo dä Zirkus mit?"
Doo sait dr Bolli zue sym Molly:
"Das isch halt jetz e CIBAFFEZOLLI!"
Au daas Joor wider: mir schiesse nit, mir schigge!
D'Ladärne-Usstellig isch vom Mändig znacht, em
1. Merze bis am Mittwuch demorge, em 3. Merze 1993 uffem Minschterplatz. Mr fraien ys uff Ire Bsuech.