Waggis-Clique
GILLERUGGER
Basel 1961
Fasnacht 2003
TAMEDIA ZIIRILISGG
Dr Basilisgg in synere Form
Gits hitte nimme s isch enorm
Tamedia haisst die ney Variante
Das isch sone rychi Zircher Dante
Ans Rhygney sinn si aabe koo
Und hänn d Basilisgge ibernoo
Yygfäädlet worde sin die Sache
Vo de Basilisgge sälber, s isch zem lache
Blau-Wyss kemme si jetz derhäär
Dr Lädermaa und sy Teddybäär
Die neye Farbe stehen ine guet
Die nämte gscheyter grad dr Huet
Am Fischmärt hänn die baide Gselle
Nur e Gschäftli drille welle
Yber 20 Millieenli hänn si yynezooge
Oder hänn si eppe derby no glooge?
Und hänn si fir die ganzi Bracht
Am Änd no ne weeneli Schwarzgäld gmacht?
Wundere dät uns das jo nit
Denn Ziircher mischle greftig mit
Farbefroh wird’s jetze gstaldet
Und die Stitz ganz guet verwaldet
Die neye Farbe sotschverbiete
Denn vor de Ziircher muesch di hiete
Mir luege zue, , dien uns nit weere
Wenn die baide fyne Heere
Dien e greesser Gschäftli mache
Do sott me s Lääder gheere grache
Mysi Deen speye uus em Äther
Die baide Bebbi sinn Verräter
Alles goot am Schluus bachab –
Jetz stellet doch dä Sänder ab!
Verroot am Volgg dien die betryybe
Die gfillte Händ dien si sich ryybe
Und de Radioheerer wird verzellt
Si haige d Waiche anders gstellt
Mir arme Sieche sinn am Arsch
Mir gheere nur no dr Säxilyttemarsch
Das wott uns aifach nimme gfalle
Mir wänn dr Baslerstab um e Ranze schnalle
Und nit die Ziircherfaane schwinge
Wo si uns derzue wänn zwinge
Die schreege Deen uus sällere Stadt
Die hämmer alli iberuus satt
Z Basel am mym Rhy – das kasch vergässe –
Mer sinn geschtert an dr Limmat oobe gsässe
Und hänn das Gjoomer miesse gheere
Wo unsere Sänder massiv duet steere
Dr Coninx und dr Martin Kall
Hänn dasmool gsorgt fir dä Sindefall
Ganz unschiniert sinn si fiirsi gschritte
Und hänn nit lang um das Radio gstritte
S Boortmenee hänn si fiire gnoo
Und e baar Millieenli uusedoo
Um em Basilisgg dr Garuss z mache
Wo blybt denn doo dr grieni Drache?
E Laili hänn si uns ins Woppe gstellt
Dä isch us em Radio uusegschnellt
Ganz uusgfitzt vo hinde het är sgmacht
Und dr Basilisgg isch zämmegracht
Himmeldruurig isch s uns z Muet
Wemmer gsehn wie unsere Voogellahme duet
Vor luter Gsoorg wird dä no griener
Am Änd gheert dä ze de gsteerte Hiener
In dr Fridmatt kasch das arme Vich denn bsueche
Deert wett au ich kai Zimmer bueche
Und das alles wägem Ziircherfilz –
Gits denn kai Mittel gäge dä Pilz?
Ziiri, nai es isch jetz Zyt
Die Ziircher geen jetz aifach z wyt
Denn wenn de gsesch, was die druus mache
Do muess jo d Wirtschaft zämmegrache
Iberall wänn si brofitiere
Derzue sich au no brofiliere
Si dien sich alles under e Naagel rysse
Und uns Bebbi massloos bschysse
Nur mit dr Schnuure wird nit gspaart
Das isch em Ziircher syni Art
So wie die Ziircher sich vermehre
Kenne mir Bebbi uns bald nimm wehre
Doch eppis Guets hets an dääne Gschichte
Mir Bebbi kenne driber brichte
Was die au immer uuseleen
Fir uns sin d Zircher dummi Gleen !
Und im Grund gnoo isch es doch fiidlewurscht
Denn uff jedem Sänder wird nur gnuuscht
Nur ains derby duet uns halt steere
Mer gheere nur no Ziircherschneere