Waggis-Clique
GILLERUGGER
Basel 1961
Fasnacht 1995
Mer baue zem Staue
Amene Mittwuch demorge, es goot gege die Nyyne
faart dr Walti mit sym Lisi und de Binggiss, de zwai fyyne
im Kaare dur d'Stadt via Gundeli ins Joggeli
-dr Andi schreyt vo hinde scho nooneme Schoggeli-
well sy dert uff d'Autibaan wänn husche,
zem noo Luzärn ins Verkeershuus z'rusche.
Doch kuum sinn sy gege d'Uffaart vo dr Autibaan koo,
blyybe sy scho s'erscht Mool im Stau inne stoo.
"E Baustell", schreyt s'Lisi und langsam rollts wyter,
rot-wissy Latte, zwai Fläschli Bier, ebbe ai Liter,
e baar Meter wyter, do stoot aine umme,
wo ainsam und verlasse e Liedli duet summe,
ain hoggt am Bode, uff sym Grind sone Huet,
wo am Rand e baar Pflänzli ussrysse duet.
Uff aimol goots wyter, d'Strooss waggst in d'Braiti
dr Walti nimmt nonem erschte Gang ändlig dr zwaiti,
är git Guzzi, dass d'Kelbe nur so dreene
s'Rutli heersch vo hinde steene:
"de muesch nit bloche, hesch's nit gheert:
sy haige in Prattele Teer uff d'Strooss gleert."
Är stoot voll in d'Gletz und sait zue dr Frau:
"Verglemmi, jetz steenmer scho wider im Stau."
Sy gseen e Wald vo Signalisatione,
d'Närve vom Walti, die miesst me jetz schone,
zerscht 80, denn 60, denn 40, denn 20,
sy Stimm wird zerscht lutt, denn lyslig, denn ranzig,
sy luege uff d'Uhr und gseen, es isch zwelfi
(das isch, me glaubts kuum, e Stund noo de Elfi),
d'Määge dien knuure, sy hänn nyt derby
derfir schnuufe sy stinggigy Teerdämpf y.
Noo zwanzig Minute doo sinn alli froo,
denn hänn sy au das ändlig hinter sich gloo,
do gruuchzt dr Andi bi ebbe ains dryssig:
"Du, Babbe, my Lag isch glaub e bizz schyssig,
ych ha im Ranze sone glunge Rumore,
ych muess jetz go pfunde, suscht frierts mer an d'Oore!"
Dr Walti knuurt:"Z'Diegte, dert geenmer denn drabb
in e Baiz, wo du kasch hogge und ych aine schnabb".
Doch dert, wo sich normalerwyys d'Strooss gable duet,
isch im Boden e Grabe, me seet nur e Huet.
"Du, Lisi, die mache uns hitt no zer Sau,
mir steen jo scho wider zmittsdrin im Stau.
E halby Stund speeter, mer schryybe halb ains
wott s'Rutli e Schoggi, doch s'Lisi hett kains.
hindereme Laschter dien sy dr Belche ab schlyyche,
ai Spur isch gsperrt, sy dien d'Leitblangge stryyche,
dr Walti, dää fluecht wiene bsoffene Kosagg
uff die Duuble im Baudepp und s'iibryge Phagg,
"Dä Ogi soot me uff d'Mittellinie stelle
und vo Basel uff Bärn die Dailstrich lo zelle!"
Doch ändlig isch au dää Fruscht z'Änd,
dr Walti git Gas, dr Andi, dä fänd,
es wurdy ebbe langsam Zyt,
dass es ebbis z'frässe git.
Wo s'Autibaan-Gryz sich pletzlig duet bilde,
gseet dr Walti e Maa, wo winggt wiene wilde
är hett e Fäänli in de Doope,
dr Walti gratzt sich nur am Tschoope
är findets glatt und duet em blingge
keert sich um und wott au wingge,
doo schreyen ally:"Spinnsch denn, Alte
due gfelligscht dy Biire fiire halte!"
Vor Schregg geenem d'Auge uff, die blaue,
do vorne dien sy scho wider staue.
Är schtoot in d'Gletz, dass d'Reife pfyffe,
s'Lisi duet sich ganz verstyffe
und sait zem Andi, wo z'fliege kunnt:
"flieg du voruss, mir bruuche none Stund."
Dä findet aber gar nyt z'lache:
"Hösch, Alte, wottsch my staubig mache?
Ych ha jetz gnueg vo dym Radau,
wott sofort use uss däm Stau.
So goots denn wyter, sy kenne aim duure:
orangy Männli, verschobeny Spuure,
Verkeerszaiche, Teerfässer, e Tempo, dass d'pennsch
aber jedesmool gseesch wyt und brait e kai Mensch.
In Sämpach goot dr Walti drabb,
keert um und sait:"Jetz biny schlabb,
ych ha kai Mumm, mir faare zrugg
via Olte, Gundeli, Wettstaibrugg.
Mir wärde lang no dängge dra:
statt Verkeers-HUUS hämmer halt Verkeers-STAU gha."
Au daas Joor wider: mir schiesse nit, mir schigge!
D'Ladärne-Usstellig isch vom Mändig znacht, em
6. Merze bis am Mittwuch demorge, em 8. Merze 1995 uffem Minschterplatz. Mr fraien ys uff Ire Bsuech.